الحكايات الشعبيه الفلسطينيه !!!

تراثنا وحكايات شعبنا الفلسطيني التي كان يقوم بدور القائها وقصها على الناس كان يسمى الحكواتي ...
اختلفت واختلطت على الجيل الصاعد الامور وابح الحكواتي تراثا من الزمن الغابر الذي يعتبرونه قد ولى بلا رجعه ...
دورنا المحافظه على الحكايه الشعبيه الفلسطينيه ولعب دور الحكواتي في القرن الواحد والعشرين وتوثيق الحكايات .
ماردت ايصاله للاخوه الاعضاء الذين يتابعون هذا القسم المهم في المنتدى البيت الفلسطيني وخاصه الحكايات الشعبيه ان يرفدو هذه الزاويه بالحكايات الشعبيه وان ينقلوها سواء من المواقع المختلفه المنتشره على الانترنت او من الختايره الذي الكثير منهم ذاكرته تمتليء بالحكايات ولكنه لايجد من يوثقها فلماذا لا نلعب هذا الدور المهم في المجتمع الفلسطيني ونحيي تراثنا من جديد لكن بشرط اساسي هو المحافظه على لغتنا العاميه التي اشتهرنا بها سواء المدنيه او الفلاحيه ...
هذه مجموعه قصصيه وحكايات شعبيه اقتبستها من بعض المواقع الفلسطينيه المهتمه ... وسيكون لي وقفه مع بعض الحكايات من بعض الختياريه المتواجدين في المخيم او اماكن سكناهم ...
اخوكم المهندس

الباطية

كان يا ما كان يا مستمعين الكلام. حتى توحدوا الله.. لا إله إلا الله.

في هون هون هالحطاب... فقير جداً. كل يوم بحمل هالشرخ وبروح ع الوعر، بقطع له حطبات، وبحملهن على ظهره وبروح ببيعهن. بشتري في حقهن لاولاده خبزات وفجلات نتفة زيت. حاجة محتاجة، منشان يوكلوا.

يوم والله هو قاعد بطق في هالشجرة وإلا طلع له من قلبها هالعبد. قاله وبعدين معك. كل يوم طق. طق. جننتنا. حطيت الصرع في راسنا.

قاله: أنا زلمة فقير على باب الله. الواحد بشتغل ع شان يطعم اعياله.

قاله العبد: ما عندكش بنت قاله عندي. قاله جيبها وأنا بغنيك.

ثاني يوم جابها.

أخذها العبد من أيدها وفات فيها بقلب هالشجرة. والله ما أقرب من فرج الله وإلا هو راجع وبيده هالباطيه. قاله خذ. قاله شو بدي بيها. لا عندي أكل ولا غيره. وشو بدي أحط بيها.

قاله اسمع تاقول لك. بتمسكها بيديك الثنتين وبتقولها:

- يا باطيه امنا وأبونا انتليلنا لحم ورز. بتنتلي أي إشي بدك بتنتلي.

قاله طيب. كثر الله خيرك. أخذ الباطيه ومشى. في الطريق قال تاشوف أجربها. وقف بعرق هالشجرة وقالها: يا باطية امنا وأبونا انتلينا لحم ورز. انتلت. قعد يوكل زي الفجعان ومن العجلة أكل وكبكب وروح يعرم.

لاقته المره ع باب الدار. وقالت له: يجيك ويهل عليك وين رحت بالبنت؟ ظيعت البنت وجبت بدالها باطيه؟ قالها: انخمي. وين راحوا الولاد. أجو يتراكظو. قالهم غسلوا منشان توكلوا.

صاروا الولاد يطلعوا حواليهم. فش إشي. قالهم غسلوا واقعدوا. حط قدامهم هالباطية الفاضية.. مرته واقفه هناك مش راضيه تقرب. تطلع عليهم. مسك أبوهم الباطيه بيديه الثنتين وقالها:

يا باطيه امنا وأبونا انتلينا لحم ورز.

انتلت.

هجموا الولاد عليها وأخذوا يوكلوا وهم طايرين من الفرح. إشي سمعوا فيه وعمرهم ما شافوه قربت المرة وهي تقول: عزى عليك شو هاظ.. بدي أوكل لي لقمه. بي، والله إنه زاكي.

اشو تبربحت هالعيله. ايش ما بدهم يوكلوا يطلبوا، لحم ورز وحلو، وكل شي. هالولاد عدلوا

مين سمع بالباطية؟ المختار جارهم. قال نادولنا هالحطاب لنشوف شو هالباطية. نادوا الحطاب إجا وجاب هالباطية. فات على هالديوان. هالزلام قاعدين. قاله المختار شو هالباطية بتاعتك هات ورينا وخلينا نطعم الزلم. قالها: يا باطية امنا وأبونا انتلينا زردة وبلاو انتلت. تبهللوا هالزلم وأكلوا وانبسطوا. قال المختار خذوا هالباطية ع الدار خليهم يغسلوها. راحوا أخذوها وغسلوها وبدلوها رجعوا للحطاب باطيه غيرها بس مثلها. أخذ الحطاب باطيته وروح. قالت له المره وين بقيت تفر الولاد جاعوا. قالها اسمعنا، هلى أنا جيت يلله غسلوا يا أولاد. غسلوا وقعدوا. قالها يا باطيه أمنا وأبونا انتلينانقول ملغوف. ما فش ملفوف انتلينا لحم ورز. ما فش لحم ورز.. قاموا.. ياكبهم يا تعسهم.

ثاني يوم حمل هالشرخ وراح ع الشجرة يطق. من أول طقه طلع له العبد. قاله: مالك جيت. ما أعطيتك إشي يغنيك. قاله: راحت الباطية. قاله وين راحت يا خريب الكوشه؟ قاله: هالمختار. أعجبته وبدلها. وما استجريتش ارجع له. قاله: طيب عندك أخرى بنت. قاله عندي قاله روح جيبها. ركظ على الدار جابها. مثل ما عمل بأختها أخذها من أيدها وفات في هالشجرة. نتفه وإلا هو راجع وبيده هالديك. قاله خذ: شو بدي بيه؟ شو بدي أطعمه؟ أنا مش لاقي أوكل أنا وأولادي. قاله: اسمع تاقولك. بتطق الديك على عرفه بنزل لك ذهب. قاله: طيب. قاله بس دير بالك عليه. راح في الطريق طق على عرف الديك. هر هالذهب حطهن باجيابه ووينك يا هالسوق. اشترى كل ما تطلب الشفه واللسان. واشترى لهالولاد أواعي ومشايات حياش من السامعين وروح بأول الشباب. رجعت هالعيله تبربحت مثل العادة وزيادة.
سمع المختار بالديك. قال نادولنا الحطاب تنشوف شو هالديك هذا اللي بتحكي الناس عنه. نادوه. شو هالديك أبيظ ابيظ مثل الثلج، وعرفه أحمر أحمر مثل الدم. ريشه نافش وحالته حالة. والله قالوا له ورينا كيف بنزل الذهب. نقفه علي عرفه هر صاع ذهب. تهجمت هالزلم على الذهب اللي صح له واحدة اللي صلح له أكثر الله أعلم بيهم.
قال المختار -ما شاء الله ما شاء الله.. هذا غناة خذوا اعلفوه عالأقلةأخذوه علفوه وطمع الدنيا قتال راحوا بدلوه. اش الك بطول السيرة رجع الحطاب ع الحصيرة
عاود عالشجرة راح يحطب قال العبد ظيعت الديك لخري قال له هذا الي صار. قال له نصيبك. في عندك بنت؟ قاله عندي. قاله جيبها.
راح جابها أخذها العبد من ايدها وغاص في الشجرة نتفة وإلا هو راجع ومعاه عصاة قاله هذه العصاب بتقول لها..
- يا عصاتي هوري هوري ع اللي أخذلي ديكي وباطيتي دوري. بتظلها تقتل فيهم تاتلين اظلاعهم ويرجعوا الباطية والديك.

قال له الحطاب..
- دلك الله ع الخير
قاله
- اياتهاواحد بقف بوجهك دير العصا عليه.
أخذ هالعصا وروح. لاقته مرته بالباب «يجيك ويهل عليك.. وين رحت بالبنت.. ظيعت لي البنات ربيتهن من مقلة العين فرن من ديتي فرة الطير».
قالها انخمي.. يا عصاتي هوري هوري ع مرتي دوري.
العصا لينت اظلاعها. اشوية صارت مرته تدعي وتشحي نادي العصا.
قالت له روح لليأخذوا ديكك وباطيتك.
قالها عند قولك راح لديوان المختار. قالها «يا عصاتي هوري هوري ع اللي اخذوا ديكي وباطيتي دوري» ونزلت فيهم. اضرب من هون ردد من هون. وين ما تيجي تيجي طلع صراخهم يا ناس منشان الله دخيل الله.. قالها تعالي يا مبروكة أجت العصا وقفت بجنبه. قالهم هاتوا الديك والباطيه الأصليات وإلا بتعرفوا اشوا بصير لكم. قالوا امرك.. جيبوا له أغراضه الله أغنانا عنهن. جابوا له الديك والباطية حطهن تحت أباطه وروح. وطار الطير الله يمسي الحاظرين بالخير.

شكرا لك اخي لؤي
فعلا رجعتنا لاحلى ايام زمان يوم ماكان الختيار يجمع هالولاد ويخرفهم قصص
موضوع شيق وتراث
شكرا لك مره اخرى بانتظار ابداعاتك

مشكور على الرد الجميل